हनुमानढोका दरबार क्षेत्रमा पर्यटकको चहलपहल

-



     सफल आवाज    
     पौष १४ गते २०७८ मा प्रकाशित



काठमाडौं, १४ पुस । कोरोनाको जोखिम कम भएसँगै विश्व सम्पदा सूचीमा सूचीकृत हनुमानढोका दरबार क्षेत्रमा विदेशी पर्यटकको चहलपहल बढ्न थालेको छ ।

कोरोना जोखिम कम हुँदै गएपछि गत साउन महिनादेखि हनुमानढोका दरबार क्षेत्र विदेशी पर्यटकका लागि खुला गरिएको थियो । साउन महिनामा दक्षिण एसियाली देशका ११ र अन्य देशका ३८ गरी ४९ पर्यटक हनुमानढोका दरबार क्षेत्रमा आएका थिए ।

भदौ महिनामा अन्य देशका ७१ र दक्षिण एसियाली देशका ३० गरी १०१ पर्यटक आएको काठमाडौं महानगरपालिका हनुमानढोका दरबार क्षेत्र संरक्षण कार्यक्रमका लेखा अधिकृत सुन्दरकाजी थुयाजुले जानकारी दिए ।

असोज महिनामा भने हनुमानढोका दरबार क्षेत्रमा विदेशी पर्यटकको संख्या ह्वात्तै बढेको थियो । असोजमा अन्य देशका ४७२ र दक्षिण एसियाली देशका १४९ गरी ६२१ पर्यटकले हनुमानढोका दरबार क्षेत्रको भ्रमण गरेका छन् । असोजको तुलनामा कात्तिकमा दरबार क्षेत्रमा विदेशी पर्यटकको संख्या तीन गुणाले बढ्यो । कात्तिकमा अन्य देशका एक हजार ५१८ र दक्षिण एसियाली देशका ५८५ गरी दुई हजार १०३ विदेशी पर्यटक दरबार क्षेत्रमा आएका छन् ।

कोरोना भाइरसको नयाँ भेरिएन्ट ओमिक्रोन फैलन थालेकाले मङ्सिरमा भने पर्यटकको संख्या केही घटेको छ । मंसिरमा अन्य देशका एक हजार २२० र दक्षिण एसियाली देशका ६५३ गरी एक हजार ८७३ पर्यटकले हनुमानढोका दरबार क्षेत्रको अवलोकन गरेका छन् ।

हनुमानढोका दरबार क्षेत्र भ्रमण गर्न आउने सार्क र बिम्स्टेक देशका नागरिकका लागि १५० रुपैयाँ शुल्क लिइन्छ । अन्य देशका नागरिकलाई भने एक हजार रुपैयाँ लिने गरिएको लेखा अधिकृत खुयाजुले जानकारी दिए ।

पर्यटकबाट आर्थिक वर्ष २०७५/७६ मा १८ करोड ७२ लाख २५ हजार ४५० रुपैयाँ आम्दानी भएको थियो । कोरोनाका कारण आव २०७६/७७ मा ११ करोड ९९ लाख ६० हजार ५६० रुपैयाँ शुल्क उठेको छ । कोरोनाको सबैभन्दा धेरै प्रभाव आव २०७७/७८ मा परेको देखिन्छ । यो वर्ष १३ लाख ५८ हजार ४५० रुपैयाँ मात्र शुल्क उठेको कार्यालयले जनाएको छ ।

चालू आर्थिक वर्ष मंसिर मसान्तसम्म ३६ लाख रुपैयाँ शुल्क उठेको छ । विदेशी नागरिकलाई टिकट दिन कार्यालयले छवटा काउन्टरको व्यवस्था गरेको छ । जुद्ध सालिक, झोँछे, दशअवतार मन्दिरअघि, सिंहसत्तल, प्याफल र मक्खन पशुपति मन्दिर छेृउमा गरी छ वटा काउन्टरले विदेशी पर्यटकलाई टिकट दिएर मात्र हनुमानढोका दरबार क्षेत्र प्रवेश गराउँछन् ।