प्रभु क्यापिटलको १ दिने शेयर बजार तालिममा २५० जनाको सहभागिता

-


     सफल आवाज    
     फागुन २ गते २०७७ मा प्रकाशित


काठमाडौं, २ फागुन । प्रभु क्यापिटलले शेयरबजार सम्बन्धी १ दिने आधारभूत तालिम संचालन गरेको छ । एनवाईइएफ वीरगञ्ज च्याप्टरको सहकार्यमा वीरगञ्जमा शनिबार शेयर बजार सम्बन्धी १ दिने आधारभूत तालिम कार्यक्रम सञ्चालन गरेको हो । उद्योग वाणिज्य संघ विरगञ्जको सभाहलमा आयोजित कार्यक्रममा करिब २५० जनाको सहभागिता रहेको बताइएको छ ।


कार्यक्रमका प्रमुख अतिथि उद्योग वाणिज्य महासंघ प्रदेश २ का कार्यकारी सदस्य तथा उद्योग वाणिज्य संघ वीरगञ्जका पूर्व अध्यक्ष अशोक टेमानीले कार्यक्रमको उद्घाटन गर्दै सहभागीहरुलाई शेयर बजारको महत्व र यसमा लगानी गर्दा हुने फाइदाहरुको बारेमा जानकारी सहितको मन्तव्य राखेका थिए ।

कार्यक्रममा प्रभु क्यापिटलका प्रबन्ध सञ्चालक दिनेश थकालीले कार्यक्रमको बारेमा प्रकाश पार्दै क्यापिटलले संस्थागत सामाजिक उत्तरदायित्व अन्तरगत आगामी दिनमा अझै व्यापक रुपमा यस्ता कार्यक्रमहरुलाई देशव्यापी रुपमा विस्तार गरिने बताए ।

आयोजनाको सम्पूर्ण तयारी गरेको नेप्लिज योंग इन्टरप्रेनर्स फोरम वीरगञ्ज च्याप्टरका अध्यक्ष अनुप अग्रवालले आगामी दिनमा वीरगञ्जका युवाहरुलाई व्यवसायिकतातर्फ सशक्त रुपमा अगाडि बढाउन यस्ता किसिमका कार्यक्रमहरु आयोजना गरिरहने जानकारी दिए । कार्यक्रममा एनवाइएफका संस्थापक अध्यक्ष अरबिन्द अमात्यले स्वागत मन्तब्य गरेका थिए । तालिम कार्यक्रमको सञ्चालन प्रभु क्यापिटलका प्रमुख सञ्चालन अधिकृत कृष्ण गिरीले गरेका थिए ।