बीमा कम्पनीले अभिकर्तालाई वितरण गर्ने कमिशन र इन्सेन्टिभ रकम अब सफ्टवेयर प्रणालीमा राख्नुपर्ने

-



     सफल आवाज    
     असार ५ गते २०७९ मा प्रकाशित



काठमाडौं, ५ असार । अबदेखि बीमा कम्पनीहरूले अभिकर्ताहरूलाई वितरण गर्ने गरिएको कमिशन र इन्सेन्टिभ बोनस सफ्टवेयर प्रणालीमा राख्नुपर्ने भएको छ ।

बीमा समितिले सम्पूर्ण जीवन बीमा कम्पनीहरूलाई अभिकर्तालाई प्रदान गर्ने गरिएको कमिशन र इन्सेन्टिभ बोनस रकमलाई पारदर्शी बनाउन निर्देशन दिएको हो ।

समितिकाअनुसार अबदेखि १९ वटै जीवन बीमा कम्पनीहरूले अभिकर्तालाई प्रदान गर्ने गरेको कमिशन र इन्सेन्टिभ रकम आफ्नो सफ्टवेयर प्रणालीमा राख्नुपर्ने उल्लेख छ ।

साउन १ गतेदेखि कम्पनीहरूले सञ्चालनमा ल्याएको सफ्टवेयर प्रणालीमा नै प्रत्येक बीमा अभिकर्ताहरूको कमिशन तथा इन्सेन्टिभ बोनस स्पष्ट रूपमा देखिने गरी भुक्तानी गर्नुपर्ने मिलाउनु पर्ने समितिद्धारा जारी निर्देशनमा उल्लेख छ ।

बीमा नियमावली २०४९ को नियम २३(१) बमोजिम बीमकले बीमा अभिकर्तालाई बीमाशुल्क रकमको आधारमा प्रदान गर्ने कमिशन र सोहि नियमावलीको नियमन २३(२) बमोजिम अतिरिक्त इन्सेन्टिभ बोनस प्रदान गर्दै आइरहेका छन् ।

आगामी आर्थिक वर्ष २०७९/८० साउन १ गतेदेखि बीमा कम्पनीले सञ्चालनमा ल्याएको सफ्टवेयर प्रणालीमा निर्देशनअनुसारको भुक्तानी व्यवस्था मिलाउनु पर्ने छ ।