इटहरी उपमहानगरपालिकाले विद्युतीय बस सञ्चालन गर्ने

सुनसरी , २३ साउन । सुनसरीको इटहरी उपमहानगरपालिकाले विद्युतीय बस सेवा सञ्चालन गर्नेभएको छ । नगर क्षेत्रमा सहुलियत बस सेवा सुरू गर्ने उद्देश्यले चार वटा बस खरिद गरिएको नगरप्रमुख हेमकर्ण पौडेलले जानकारी दिएका छन ।

यस कार्यले स्थानीय नागरिकलाई यात्राका लागि सहज हुने विश्वास व्यक्त गर्दै नगरप्रमुख पौडेलले भने, “इटहरीका चारवटै क्षेत्रलाई समेट्ने गरी रुट तय गर्ने काम भइरहेको छ । सो कार्य सम्पन्न भए लगत्तै सेवा सञ्चालन गरिने बताईएको छ ।

आगामी असोज १ गतेबाट सेवा सञ्चालन गर्ने उप महानगरको योजना छ । उपमहानगरपालिकाका इञ्जिनियर रुपेश आचार्यले ६ करोड ३६ लाख ८६ हजारको लागतमा बस खरिद गरिएको बताएका छन ।

उनका अनुसार “बसमा जीपीएस जडान, सीसी क्यामेरा, एसीलगायतका अन्य सुविधाको व्यवस्थापन गरी सूचना प्रविधिमैत्री बनाइएका छन् ।”

नगर बस सञ्चालनका लागि कार्यपालिका बैठकले वडा नं ६ का अध्यक्ष दिवस पोखरेलको संयोजकत्वमा समिति बनाएर काम गरिरहेको छ ।