अब प्रहरीले पेट्रोल पम्पलगायत २५ ठाउँमा चार्जिङ स्टेशन राख्ने

-



     सफल आवाज    
     भाद्र ७ गते २०७९ मा प्रकाशित



काठमाडौं, ७ भदौ । अब प्रहरी कल्याण कोषले सञ्चालन गरेको ५ वटा पेट्रोल पम्प, प्रस्तावित ४ वटा पेट्रोल पम्प तथा प्रहरी कार्यालयहरुका अन्य उपयुक्त स्थानहरु गरी २५ ठाउँमा चार्जिङ स्टेसन स्थापना हुने भएको छ ।

यसका लागि नेपाल प्रहरी र नेपाल विद्युत् प्राधिकरणबीच विद्युतीय सवारी चार्जिङ स्टेसन निर्माण तथा सञ्चालनसम्बन्धी समझदारीपत्रमा सोमबार हस्ताक्षर भएको छ ।

प्रहरी प्रधान कार्यालय नक्सालमा आयोजित एक कार्यक्रमका बिच नेपाल प्रहरीको तर्फबाट प्रहरी महानिरीक्षक धिरज प्रताप सिंह र प्राधिकरणकातर्फबाट कार्यकारी निर्देशक कुलमान घिसिङले समझदारीपत्रमा हस्ताक्षर गरेका हुन् । 

यी २५ ठाउमा राखिने चार्जिङ स्टेसन दीर्घकालीनरुपमा प्रहरी कल्याण कोष मातहतमा रहने गरी सञ्चालन नेपाल प्रहरीका प्रवक्ता डीआईजी टेकप्रसाद राईले जानकारी दिए । 

प्राधिकरणले प्रहरीसँगको समझदारी अनुसार आफ्नै खर्चमा चार्जिङ स्टेसनका सम्पूर्ण उपकरण खरिद तथा पूर्वाधार निर्माणका साथै उपकरणहरुको मर्मत तथा नियमित सर्भिसिङसमेत प्राधिकरणले नै गर्ने बताइएको छ ।

उता पूर्वाधार निर्माणका लागि उपयुक्त स्थान उपलब्ध गराउने र निर्माण भएपछि चार्जिङ स्टेसनको सञ्चालन तथा सुरक्षा गर्ने जिम्मेवारी भने नेपाल प्रहरीको रहने भएको छ ।

चार्जिङ स्टेसन सञ्चालन गर्दा प्राधिकरणले समयानुकूल निर्धारण गरेको दरमा सर्वसाधारणलाई समेत सर्वसुलभ रुपमा उपयोगगर्न पाउने व्यवस्था गर्नुपर्ने समझदारीपत्रमा उल्लेख छ । यसरी राखिएका चार्जिङ स्टेशनमा सवारी साधन चार्ज गर्दा उपभोक्ताले तिरेको महसुल प्राधिकरणले संकलन गर्ने प्रावधान राखिएको छ । 

यसैगरी विद्युत वितरण विनियमावलीको व्यवस्था बमोजिम विद्युत महसुल दरको शुल्कमा हुने कुल नाफाको ५० प्रतिशत रकम चार्जिङ स्टेसनको सञ्चालन तथा व्यवस्थापन खर्चको रुपमा प्रहरीको कल्याण महाशाखाको खातामा जानेछ ।