वैदेशिक रोजगारीमा पठाउने भन्दै ठगी गर्ने ४ जना पक्राउ

-



     सफल आवाज    
     भाद्र ११ गते २०८० मा प्रकाशित



काठमाडौँ, ११ भदौ । काठमाडौँ उपत्यका अपराध अनुसन्धान कार्यालयको टोलीले वैदेशिक रोजगारीका लागि विभिन्न मुलुक पठाइदिने भन्दै रकम ठगी गरेकाे अभियोगमा ४ जनालाई विभिन्न् स्थानबाट पक्राउ गरेकाे छ । पक्राउ पर्नेमा नवलपरासी देवचुली नगरपालिका–८ घर भई कठमाडौँ टोखा नगरपालिका–३ बस्ने ३० वर्षीय समीर आलेमगर, रामेछाप उमाकुण्ड गाउँपालिका–१ घर भई काठमाडौँ कागेश्वरी मनोहरा नगरपालिका–८ गोठाटार बस्ने ३५ वर्षीया शर्मिला सुनुवार रहेका छन ।

त्यस्तै सल्यान कपुरकोट गाउँपालिका–३ घर भई भक्तपुर सूर्यविनायक नगरपालिका–१ बस्ने ५१ वर्षीय जगतबहादुर खड्का र कास्की पोखरा महानगरपालिका घर भई ललितपुर महानगरपालिका–१४ नख्खीपोट बस्ने ४० वर्षीया तारा गुरुङ रहेका काठमाडौँ उपत्यका अपराध अनुसन्धान कार्यालयका प्रवक्ता तथा प्रहरी उपरीक्षक मिलन केसीले जानकारी दिएका छन ।

उनका अनुसार पक्राउ परेकामध्ये मगरले २ जनालाई क्यानडा पठाइ प्रतिष्ठित मार्केटमा मासिक २ लाख तलबमा काम लगाइदिने जनाउँदै पीडितहरुबाट ५ लाख ४५ हजार ठगी गरेको, सुनुवारले १ जनालाई क्रोएसिया पठाइ फुड प्याकिङमा मासिक १ लाख तलबमा काम लगाइदिने भन्दै पीडितबाट पटकपटक गरी २ लाख ठगी गरेको, खड्काले १ जनालाई कुँवेत पठाइ बाइक राइडरमा मासिक ५० हजार तलबमा काम लगाइदिने भन्दै पीडितबाट पटकपटक गरी १ लाख ९४ हजार ठगी गरेका आरोपमा पक्राउ गरिएको हो ।

यसैगरी गुरुङले १ जनालाई नेदरल्याण्ड पठाई सुपर मार्केटमा मसिक १ लाख तलबमा काम लगाइदिने जनाउँदै प्रलोभनमा पारी पीडितबाट पटकपटक गरी ३ लाख ४५ हजार ठगी गरेको आरोपमा पक्राउ गरिएको हो । पक्राउ परेकालाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रवक्ता तथा प्रहरी उपरीक्षक केसीले बताएका छन ।