महाबु सडकखण्ड स्तरोन्नतिका लागि ८ करोडकाे ठेक्का

-



     सफल आवाज    
     भाद्र १९ गते २०७७ मा प्रकाशित



दैलेख, १९ भदौ । महावु–कालिकोट–जुम्ला–मुगु–डोल्पा हुँदै चीनको नाम्चेनाग्ला जोड्ने त्रिदेशीय महत्व बोकेको महावु सडक खण्डको कालोपत्रेका लागि रु ८ करोड बढीको ठेक्का आह्वान गरिएको छ । संघ सरकारको सडक डिभिजन कार्यालय सुर्खेतमार्फत निर्माणका लागि ठेक्का खोलिएको हो ।

सदरमुकाम आसपास हुँदै महावु खण्डको स्तरोउन्नतिका लागि पहिलो चरणको ठेक्का खुलाइएको सुर्खेत सडक डिभिजन कार्यालयका सूचना अधिकारी देवेन्द्र भट्टराईले जानकारी दिए । त्रिदेशीय सडकअन्तर्गत निर्माणका लागि गत वर्ष प्रतिनिधिसभा सदस्य रवीन्द्रराज शर्माले आफ्नो निर्वाचन क्षेत्र विकास कोषको रु ६ करोडबाट कालोपत्रे शुरु गरेका थिए ।

गत वर्ष निर्माण व्यवसायीले काम नसकेपछि जिम्मेवारी लिएका निर्माण कम्पनीलाई नै काम पूरा गर्न ६ महिनाको म्याद दिईने भएको छ । सोही अवधिमा काम सम्पन्न भए मात्र भुक्तानी दिने गरी अर्थ मन्त्रालयमा प्रक्रिया थालनी गरिएको प्रतिनिधिसभा सदस्य शर्माले जानकारी दिएको रासस लेखेकाे छ ।