चार देशमा उडान खुला,विदेशबाट आउने यात्रु १० दिन अनिवार्य क्वारेन्टिनमा बस्नुपर्ने

-


     सफल आवाज    
     जेठ २० गते २०७८ मा प्रकाशित


काठमाडाैं, २० जेठ । सरकारले चार देशमा उडान खुला गरेकाे छ । याे समयमा विदेशबाट नेपाल आउने यात्रु तथा पर्यटकहरू अनिवार्य १० दिन क्वारेन्टिनमा बस्नु पर्ने भएकाे छ । उनीहरूलाई लक्षित गर्दै सरकारले पर्यटन विभागमा दर्ता भएका ७८ वटा होटललाई क्यारेन्टिन होटलको रुपमा सूचिकरण गरेको छ । भारत लगायत तीन गन्तव्यको उडानबाट नेपाल आउने यात्रुका लागि ७८ वटा होटललाई क्वारेन्टिन होटल बनाइएको हाे ।

पर्यटन विभागले पर्यटकदेखि पाँचतारे स्तरसम्मका ७८ वटा होटलको नाम क्वारेन्टिन होटलको रुपमा सार्वजनिक गरेको हो । आजदेखि भारतलगायत कतार, टर्की र चीन गरी चार गन्तव्यका लागि उडान खुला गरिएकोले उक्त चार गन्तव्यबाट स्वदेश आउने यात्रुका लागि होटललाई क्वारेन्टिन बनाइएको हो ।

कोरोना महामारी नियन्त्रणका लागि सरकारले भारतलगायत अन्य देशबाट आउने यात्रुलाई अनिवार्य रुपमा १० दिन क्वारेन्टिनमा बस्नुपर्ने व्यवस्था गरेको छ । यस्तै, खाडी मुलुकाबाट आउनेले पाँच दिन बसे पुग्छ भन विशेष परिस्थिति भएकालाई होम क्वारेन्टिनमा पठाउने व्यवस्था पनि रहेको छ ।

विभागले सार्वजनिक गरेको ७८ वटा होटलमध्येमा पाँचतारे स्तरका ७ वटा होटल रहेका छन् । विभागको सूचना अनुसार काठमाडौंमा सञ्चालित सांग्रिला, होटल र्याडिसन, होटल याक एण्ड यति, ह्ययात रिजेन्सी सोल्टी, अलफ्ट होटल र एभरेष्ट होटललाई क्वारेन्टिन तोकिएको हो । पाँचतारे होटलका सञ्चालकले २५ भन्दा बढी कोठा क्वारेन्टिनका लागि छुट्टाएका छन् ।

यस्तै, चारतारे स्तरका होटल शंकर र होटल हिमालय, तीनतारे स्तरका समिट होटल, अमादब्लम होटल, साम्बाला होटल, लि हिमालय, होटल प्लाटिनम, होटल ट्रेडिसनल कम्फर्ट र होटल ल्याण्डमार्क गरी ७ होटल क्वारेन्टिनका रुपमा सूचिकरण भएका छन् । यसबाहेक पर्यटनस्तरका ५१ होटल र दुई रिसोर्ट पनि क्वारेन्टिन सूचीमा समावेश छन् ।

यसअघि नै एयर बबल अवधारण अनुरुप नेपाल भित्रनेहरुका लागि संस्कृति, पर्यटन तथा नागरिक उडड्यन मन्त्रालयले ८ वटा होटललाई क्वारेन्टिन होटलका रुपमा छुट्टाएको थियो । उक्त होटलमा ७० हाटल थप गरी ७८ वटा होटललाई क्वारेन्टिन बनाईएको हो ।

विभागले पर्यटकस्तरका होटलको दैनिक शुल्क रु तीन हजार, बिहानको खाजा, खाना, दिउँसोको खाजा र साँझको खाना तोकेपनि तारे होटलको शुल्क तोकिएको छैन । तारे होटललाई क्वारेन्टिन होटल बनाइएको भन्दै शुल्क निर्धारण नगरिएको विभागका महानिर्देशक रुद्रसिंह तामाङले जानकारी दिए । तारे होटलका सञ्चालकले क्वारेन्टिन शुल्क आफैँ निर्धारण गर्नेछन् ।