१९ औं आहा ! रारा गोल्डकपको उपाधि संकटालाई, राजाबाबु बने उत्कृष्ट खेलाडी

-



     सफल आवाज    
     चैत्र २८ गते २०७७ मा प्रकाशित



पोखरा, २८ चैत । १९ औं संस्करणको आहा ! रारा गोल्डकपको उपाधि संकटा क्लबले जितेको छ ।
पोखरा रंगशालामा शनिबार फाइनलमा संकटाले अफ्रिकन रुट एसोसिएसन, क्यामरुनलाई टाइब्रेकरमा ४–२ गोलअन्तरले पराजित गर्दै उपाधि जितेको हो ।

जितका लागि पेनाल्टी सुटआउमाट संकटाका लागि अमित तामाङ, सुवास गुरुङ, नेराज बस्नेत र आयुष घलानले गोल गरेका थिए । सरोज दाहालकै प्रहार विपक्षी किपरले बचाए ।

उता, अफ्रिकन रुट एसोसिएसनका एमबाकोपको प्रहार विपक्षी किपर राजाबाबु थापाले उत्कृष्ट सेफ गरे भने कुटीको पहिलो प्रहार नै खेर गएको थियो । उसका लागि यानिक र रिमलेमात्र बललाई जाली चुमाउन सके । विजेताले १० लाख रुपैयाँ र उपविजेताले ५ लाख पुरस्कार पाए ।

प्रतियोगितामा संकटाका किपर राजाबाबु थापा उत्कृष्ट खेलाडी घोषित हुँदै स्कुटर चढे । विधागत उपाधि पनि संकटाको पक्षमा धेरै गयो । जसमा राजाबाबु थापा उत्कृष्ट कीपर, नेराज बस्नेत उत्कृष्ट डिफेन्डर घोषित हुँदा अफ्रिकनका रिम उत्कृष्ट मिडफिल्डर, बसिक उत्कृष्ट स्ट्राइकर र सर्ज बोरिस उत्कृष्ट कोच घोषित भए ।

हाइ स्कोररको उपाधि ४ जनाले बाँडेर लिए । जसमा नेपाल प्रहरी क्लबका बुद्धबल लामा, संकटाका ग्लोरी, अफ्रिकन रुट्सका मौसा र बसिक हुन् ।

निर्धारित ९० मिनेटको खेल १–१ को बराबरीमा टुंगिएपछि अतिरिक्त ३० मिनेटमा दुवै पक्षबाट गोल हुन नसक्दा पेनाल्टी सुट आउटको सहयोग लिनुपरेको हो । ९० मिनेटको खेलमा अफ्रिकन रुट्सका लागि ज्याकस बसिकले पहिलो हाफमा गोल गर्दै टिमलाई अग्रता दिलाएकोमा दोस्रो हाफको सुरुवातमै संकटाका लागि विदेशी खेलाडी ग्लोरीले बराबरी गोल फर्काएका हुन् । छैटौ पटकसम्मको सहभागितामा संकटा यसअघि सेमिफाइनलबाटै बाहिरिएको थियो ।

विजेतालाई प्रमुख अतिथि गण्डकी प्रदेश मुख्यमन्त्री पृथ्वीसुव्वा गुरुङ लगायतले पुरस्कार प्रदान गरे।

हिमश्री फुड्स प्रालिको मुख्य प्रायोजनमा गत चैत २१ देखि सुरु प्रतियोगितामा ८ टिमले भाग लिएका थिए । गत वर्ष मनाङ मस्र्याङ्दीले उपाधि जितेको थियो । तस्विर : अशेष शाक्य