सेन्ट्रल जोन भलिबल : नेपाल महिलातर्फ फाइनलमा प्रवेश

-



     सफल आवाज    
     पौष ११ गते २०७८ मा प्रकाशित



काठमाडौं, ११ पुस । एसियन सिनियर सेन्ट्रल जोन पुरुष तथा महिला भलिबल च्यालेन्ज कपअन्तर्गत महिलातर्फ नेपाल फाइनलमा प्रवेश गरेको छ । नेपाल लगातार चौथो जित निकाल्दै उपाधि नजिक पुगेको हो ।

मिरपुरस्थित शाहिद शुरवार्दी इन्डोर स्टेडियममा जारी प्रतियोगिताअन्तर्गत आइतबार भएको लिग चरणको चौथो खेलमा नेपालले उज्वेकिस्तानलाई ३-० को सोझो सेटमा हराउन सफल भयो । नेपालले उज्वेकिस्तानमाथि २५-२०, २५-२३, २५-१४ को जित निकालेको थियो ।

नेपाले पहिलो खेलमा श्रीलंकालाई ३-२, दोस्रो खेलमा माल्दिभ्सलाई ३-० र तेस्रो खेलमा आयोजक बंगलादेशलाई ३-० को सोझो सेटमा हराएको थियो । लिग चरणको एक खेल अगावै फाइनलमा स्थान बनाएको नेपालले अन्तिम खेल सोमबार किर्गिस्तानसँग खेल्नेछ । जितसँगै नेपाल शीर्षस्थानमा छ । नेपालले चार खेलबाट ११ अंक बनाएको छ ।