केन्याद्वारा नेपालसमक्ष २ सय १९ रनको लक्ष्य

-



     सफल आवाज    
     भाद्र १७ गते २०७९ मा प्रकाशित


फाइल फोटो


काठमाडौं, १७ भदौ । नेपाललाई केन्याले जितका लागि २ सय १९ रनको लक्ष्य दिएको छ । नेपाल र केन्याबीचको तीन एक दिवसीय सिरिजअन्तर्गत आज जारी पहिलो खेलमा घरेलु टोली केन्याले नेपाललाई जितका लागि दुई सय १९ रनको लक्ष्य दिएको हो ।

केन्याको नैरोबीस्थित जिमखाना क्रिकेट मैदानमा टस जितेर पहिले ब्याटिङ रोजेको केन्याले ४८ दशमलव १ ओभरमा सबै विकेट गुमाउँदै दुई सय १८ रनको योगफल बनाएको हो । केन्याका लागि रकिप पटेलले सर्वाधिक ६७ रनको योगदान दिए भने कोलिन्स ओबुयाले ६२ रन बनाए । यसैगरी इरफान करिमले ३० रन र सचिन भुडियाले २६ रन जोडे ।

बलिङतर्फ नेपालका सोमपाल कामी र करण केसीले  समान ३-३ विकेट लिए भने आदिल अन्सारी र पवन शर्राफले १-१ विकेट हात पारे । नियमित कप्तान सन्दिप लामिछाने क्यारेबियन प्रिमियर लिग खेल्न वेस्टइन्डिज गएपछि आजको खेलमा रोहितकुमार पौडेलले नेतृत्व गर्दैछन् । उक्त सिरिजअन्तर्गतको दोस्रो खेल भालि शनिबार र तेस्रो खेल सोमबार हुनेछ ।

यसअघि नेपाल र केन्याबीच भएको पाँच खेलको टी ट्वान्टी सिरिज नेपाल ३–२ ले विजयी भएको थियो । नेपाल अहिले जवाफी ब्याटिङमा उत्रेको छ ।