झापामा ४ महिनामा ३७ जना एचआइभी एड्सबाट सङ्क्रमित

-



     सफल आवाज    
     मंसिर १५ गते २०७९ मा प्रकाशित



झापा, १५ मंसिर । झापामा ४ महिनाको अवधिमा ३७ एचआइभी एड्स सङ्क्रमित थपिएका छन् । यो वर्षको साउनदेखि कात्तिकसम्म सो सङ्ख्यामा एचआइभी एड्स सङ्क्रमित थपिएका हुन् ।

स्वास्थ्य कार्यालय झापाका एचआइभी एड्स फोकल पर्सन वीरेन्द्र दासका अनुसार दमकस्थित दमक अस्पतालमार्फत औषधि सेवन गर्नेगरी ११ तथा प्रादेशिक अस्पताल भद्रपुरमार्फत औषधि सेवन गर्नेगरी २६ एचआइभी सङ्क्रमित थपिएका हुन् । गत वर्ष ३० जनामा एचआइभी एड्स सङ्क्रमण भएको थियो । जिल्लामा हाल ६ सय ३६ एचआइभी सङ्क्रमितले नियमित औषधि (एआरटी) सेवन गरिरहेका छन् ।

दमक अस्पतालअन्तर्गत २ सय ११ र प्रादेशिक अस्पताल भद्रपुरअन्तर्गत ४ सय २५ जनाले एआरटी औषधि सेवन गरिरहेको स्वास्थ्य कार्यालयले जनाएको छ । ‘एड्स अन्त्यका लागि समानताको सुनिश्चितता गरौँ’ नाराका साथ आज जिल्लामा विविधि कार्यक्रम गरी ‘विश्व एड्स दिवस’ मनाइँदैछ ।