फिफा विश्वकपमा आज कुन कुन टिम खेल्दैछन्?

-



     सफल आवाज    
     मंसिर २० गते २०७९ मा प्रकाशित



काठमाडौं, २० मंसिर । कतारमा जारी फिफा विश्वकप २०२२ अन्तर्गत आज प्रि-क्वार्टरफाइनल अर्थात् ग्रुप अफ १६ चरणका अन्तिम दुई खेल हुँदैछन् ।

आजको पहिलो खेल मोरक्को र स्पेनबीच हुनेछ । समूह एफको विजेता मोरक्को र समूह ईको उपविजेता स्पेन बीचको खेल बेलुकी पौने ९ बजे एजुकेसन सिटी स्टेडियममा सुरु हुनेछ । यसैगरी आजको दोस्रो खेल पोर्चुगल र स्वीटजरल्याण्डबीच खेल मध्यराति पौने १ बजे हुनेछ । यी दुई खेलपछि अन्तिम १६ को खेलहरु सकिनेछन् र प्रि-क्वार्टरफाइनल अर्थात् ग्रुप अफ १६ चरण पूरा हुनेछ ।

समूह चरणमा अपराजित रहेको मोरक्कोले समूह विजेता बन्ने क्रममा बेल्जियम र क्यानडालाई हराएको थियो । क्रोएसियासँग भने बराबरी भएको थियो । स्पेनले कोस्टारिकालाई पराजित गरेको थियो भने जर्मनीसँग बराबरी खेलेको थियो । जापानसँग स्पेन पराजित भएको थियो ।

आज हुने दुवै खेलको विजेताले क्वाटरपाइनलमा एक आपसमा प्रतिस्पर्धा गर्नेछन् भने हार्ने टोलीको विश्वकप यात्रामा यहीँ विराम लाग्नेछ । हालसम्म नेदरल्याण्ड्स, अर्जेन्टिना, फ्रान्स, इंग्ल्याण्ड, क्रोयसिया र ब्राजिलले क्वाटरफाइनलमा स्थान बनाइसकेका छन् ।