भारतलाई हराउँदै नेपाल यू-२० महिला च्याम्पियनसिपको फाइनलमा

-



     सफल आवाज    
     माघ २४ गते २०७९ मा प्रकाशित



२४ माघ, काठमाडौं । भारतलाई ३-१ गोलले हराउँदै नेपाल बंगलादेशमा जारी साफ यू-२० महिला च्याम्पियनसिपको फाइनलमा प्रवेश गरेको छ ।

ढाकामा रहेको बीएसएसएस मोस्ताफा कमल स्टेडियममा मंगलबार भएको लिग चरणको आफ्नो अन्तिम खेलमा नेपालले उत्कृष्ट प्रदर्शन गर्दै भारतलाई पराजित गरेको हो । पहिलो हाफमा एक गोलले पछि परेको नेपालले दोस्रो हाफमा पुनरागमन गर्दै ३-१ को गोल को नतिजा निकालेको हो ।

खेलको २१औं मिनेटमा भारतकी अपुर्व नाजारीले गोल गरेकोमा ४७औं मिनेटमा नेपालकी अन्जली चन्दले बराबरी गोल गरिन् । कप्तान प्रिती राईले ६८औं मिनेटमा पेनाल्टी मार्फत गोल गर्दै नेपाललाई २-१ को अग्रता दिलाइन् । अग्रता बनाएपछि भारतमाथि हावी भएको नेपालका लागि अमिसा कार्कीले ८९औं मिनेटमा गोल गर्दै ३-१ को जित दिलाउँदै टिमलाई फाइनल पुरर्याइन् ।

नेपाल फाइनल पुगेको यो दोस्रो पटक हो । सन् २०१८ मा पहिलो पटक भएको च्याम्पियनसिपमा नेपाल फाइनलमा बंगलादेशसँग पराजित भएको थियो ।