हेलम्बुमा महिला भलिबल प्रतियोगिता सुरु

-



     सफल आवाज    
     मंसिर २७ गते २०७९ मा प्रकाशित



सिन्धुपाल्चोक, २७ मंसिर । हेलम्बु गाउँपालिका शिक्षा, युवा तथा खेलकुद शाखाको आयोजनामा हेलम्बुको चिलाउनेघारीमा सिन्धुपाल्चोक जिल्ला अन्तर पालिकास्तरीय महिला भलिबल प्रतियोगिता सुरु भएको छ । प्रतियोगिताको आज गाउँपालिकाका उपाध्यक्ष अप्सरा लामिछाने र प्रमुख प्रशासकीय अधिकृत उदयराज भट्टराईले बल हस्तान्तरण गरेर संयुक्त रुपमा उद्घाटन गरे । उद्घाटन खेल हेलम्बु गाउँपालिका र मेलम्ची नगरपालिकाबीच भएको छ ।  

प्रतियोगितामा हेलम्बु गाउँपालिका, मेलम्ची नगरपालिका, इन्द्रावती गाउँपालिका र चौतारा साँगाचोकगढी नगरपालिकाको सहभागिता रहेको उपाध्यक्ष लामिछानेले जानकारी दिए । महिलालाई खेल क्षेत्रमा अघि बढाउन पालिकाले सदैव सहयोग गर्ने उहाँले बताए ।

प्रतियोगितामा पहिलो हुनेले १ लाख ११ हजार १ सय ११, दोस्रोले ६५ हजार १ सय ११, तेस्रोले ३५ हजार १ सय ११ र सान्त्वनाले २५ हजार १ सय ११ रुपैयाँ प्राप्त गर्ने आयोजकले जनाएको  छ ।  प्रतियोगिता भोलिसम्म चल्ने खेलाडी श्याम शर्मा एलसीले जानकारी दिए ।