नामिबियाविरुद्धको खेलमा टस जितेर बलिङ गर्दै नेपाल

-



     सफल आवाज    
     फागुन २ गते २०७९ मा प्रकाशित


फाइल फोटो


काठमाडौं, २ फागुन । आइसिसी विश्वकप क्रिकेट लिग–दुईको त्रिकोणात्मक एकदिवसीय सिरिजअन्तर्गत आजदेखि घरेलु मैदानमा सुरुआत भएको खेलमा नेपालले पहिले फिल्डिङ गरिरहेको छ ।

यतिबेलासम्म नामिबियाले ४० ओभर खेल्दै ४ विकेटको क्षतिमा १९० रन बनाएको छ । नामिबियाका माइकल लिगेनले शतकको नजिक छन् । उनी ११५ बलमा ९९ रनमा अविजित रहेका छन् । यसैगरी गेर्हार्ड एरास्मसले ५६ रन बनाएका थिए ।

नेपालले आज सन्दीप लामिछानेलाई पनि मैदानमा उतारेको छ । नाबालिक बलात्कारको आरोपपछि करिब–करिब पाँच महिनापछि सन्दीपले टोलीमा पुनरागमन गरेका हुन् । बलिङतर्फ सन्दीप लामिछाने, कुशल मल्ल, करण केसी र सोमपाल कामीले समान १-१ विकेट लिएका छन् ।

कीर्तिपुरस्थित त्रिवि क्रिकेट मैदानमा नामिबियाविरुद्धको पहिलो खेलमा नेपालले टस जितेर पहिले फिल्डिङ गर्ने निर्णय गरेको हो । यससँगै नामिबियाले पहिले ब्याटिङ गरिरहेको छ । नेपालले आफ्नो दोस्रो खेल स्कटल्याण्डसँग फागुन ५ गते खेल्नेछ । सिरिजमा नेपाल २४ खेलमा १८ अङ्क जोडेर अङ्कतालिकाको छैटौँ स्थानमा रहेको छ । यता नामिबिया ३० खेलमा ३७ अङ्क जोडेर अङ्कतालिकाको तेस्रो स्थानमा रहेको छ ।

यसैगरी स्कटल्याण्ड ३२ खेलमा ४६ अङ्कसहित शीर्षस्थानमा छ भने ओमान ३६ खेलमा ४४ अङ्कसहित दोस्रो स्थानमा छ । ३६ खेलमा ३५ अङ्क जोडेको अमेरिका चौथो स्थानमा भने पाँचौँ स्थानको युएईको २६ खेलमा २७ अङ्क छ । सातौँ स्थानको पपुवा न्युगिनीको २८ खेलमा पाँच अङ्क रहेको छ ।