मोरिसस विरुद्धको दोश्रो मैत्रीपूर्ण खेलमा नेपाल १/० ले विजयी

-



     सफल आवाज    
     माघ १८ गते २०७८ मा प्रकाशित



काठमाडौं, १८ माघ । नेपाल र मोरिससबीचको आज भएकाे दाेश्राे मैत्रीपूर्ण खेल पनि नेपालले जितेको छ । नेपालले मोरिससलाई १, ० ले पराजित गरेको हो ।

खेलको १० औं मिनेटमा सुजल श्रेष्ठले गरेको १ गोल नै निर्णायक गोल भयो । नेपालका लागि उनको यो तेश्रो अन्तर्राष्ट्रिय गोल हो । सन् २०१६ मा उनले एएफसि सोलिडारिटी कपको दौरानमा २ गोल गरेका थिए ।

आजको खेलमा भएको जितसंगै नेपालले मैत्रीपूर्ण दुई खेल आफ्नो पक्षमा पार्न सफल भएकाे छ । यसअघिको पहिलो खेलमा पनि नेपाल १, ० ले विजयी भएको थियो ।

मैत्रीपूर्ण खेल भएता पनि आजको खेल तनाब र दबाबपूर्ण रहेको थियो । खेल सकिन २० मिनेट बाँकी छँदा दुबै टीमका खेलाडीबीच धकेलाधकेलको स्थिति थियो । सो क्रममा दुबै तर्फका खेलाडीलाई रेफ्रि नबीन्द्र महर्जनले रातो कार्ड देखाएका थिए । मोरिससका एडरिन बोटबर र नेपालका पुजन उपरकोटीले एकैपटक रातोका कार्ड पाएका हुन । रातो कार्ड पाउने नेपालका गोल रक्षक विकास मल्ल पनि रहेका छन् ।

सनसनिपूर्ण दोश्रो हाफको ८० औं मिनेटमा मोरिससका इमानुअल फुलचन्डले दोहोरो पहेंलो कार्ड पाएपछि मैदान बाहिर गएका थिए । खेलको अन्तिम समय हुनै लाग्दा फ्लड लाईडको उज्यालो खेल खेल्नका लागि पर्याप्त नभएपनि खेल १० मिनेट रोकिएको थियो ।