केन्यासँगको क्रिकेट सिरिजका लागि सोमबार छुटेका ७ जना आज उड्दै

-



     सफल आवाज    
     भाद्र ७ गते २०७९ मा प्रकाशित



काठमाडौं, ७ भदौ । पाँच खेलको टी-ट्वान्टी अन्तराष्ट्रिय र ३ खेलको एकदिवसीय सिरिज खेल्न सोमबार केन्या जान नपाएका ७ जना आज उड्ने भएका छन् ।  

ढिलो भिसा आएका कारण पाँच खेलाडी, व्यवस्थापक र प्रशिक्षक गरी ७ जना सोमबार केन्या उड्न पाएका थिएनन् । ११ खेलाडी, मुख्य प्रशिक्षक मनोज प्रभाकर, फिजियो विक्रम न्यौपाने र एनालिस्ट रमन शिवाकोटीसहित १४ जना भने सोमबार राति नै  केन्याको राजधानी नैरोबी प्रस्थान गरेका थिए ।

सोमबार टोलीसँगै जान नपाएका ५ खेलाडीसहित ७ जना भने आज राति केन्या प्रस्थान गर्ने भएका हुन् । व्यवस्थापक सुनील महासेठ, प्रशिक्षक भारतीय अब्दुल सतार र ५ खेलाडी सोमपाल कामी, बसिर अहमद, शाहब आलम, आदिल अलाम र विवेक यादव दोस्रो चरणमा आज राति केन्या उड्ने भएका हुन् ।