एसिया कप: भारतको दोस्रो हार, श्रीलंका ६ विकेटले विजयी

-



     सफल आवाज    
     भाद्र २२ गते २०७९ मा प्रकाशित



काठमाडौं, २२ भदौ । एसिया कप टी-२० क्रिकेटको सुपर फोर चरणको खेलमा श्रीलंकाले भारतलाई ६ विकेटले पराजित गरेको छ । सुपर फोर चरणमा श्रीलंकाले २ खेलमा लगातार दोस्रो जित हात पारेको हो भने भारतले २ खेलमा दुवैमा पराजय भोगेको छ । यसअघि सुपर फोरको पहिलो खेलमा भारतलाई पाकिस्तानले हराएको थियो।

सुपर फोरका दुवै खेलमा भारतले दिएको विजय लक्ष्य विपक्षी टोलीले १ बल बाँकी छँदै पूरा गरेका हुन् । पाकिस्तानले १८१ रनको लक्ष्य तथा श्रीलंकाले १७३ रनको लक्ष्य समान १९.५ ओभरमा पूरा गरेर भारतविरुद्ध रोमाञ्चक जित हात पारेका हुन् । 

श्रीलंकाका लागि कप्तान दासुन शनकाले नटआउट ३३ रन र भानुका राजापाक्षाले नटआउट २५ रन बनाए । त्यसअघि ओपनरद्वय पाथुन निशंकाले ५२ रन र कुशल मेन्डिसले ५७ रनको योगदान गरेका थिए । 

बलिङतर्फ भारतका युजवेन्द्र चाहलले एकै ओभरमा दुईसहित तीन विकेट लिए । उनले शुरुवाती ब्याट्सम्यानको साझेदारी तोडेका थिए । 

पहिले ब्याटिङ गरेको भारतले ८ विकेटको क्षतिमा १७३ रन बनाएको थियो जसमा कप्तान रोहित शर्माको ७२ रनको योगदान थियो । केएल राहुल ६ रन तथा विराट कोहली शून्यमा आउट भए । सूर्यकुमार यादवले ३४ रन जोडे । बलिङतर्फ श्रीलंकाका दिलशन मधुशंकाले ३ विकेट लिए । 

यो जितसँगै श्रीलंकाको २ खेलबाट ४ अंक भएको छ भने पाकिस्तानको १ खेलबाट २ अंक रहेको छ । यसैगरी २ मा २ खेल नै हारेकाो भारत तथा १ मा एक खेल हारेको अफगानिस्तानले सुपर फोर चरणमा अंकको खाता खोल्न सकेका छैनन् ।