नेदरल्याण्ड्ससँग हारेसँगै दक्षिण अफ्रिकाको विश्वकप यात्रा समाप्त

-



     सफल आवाज    
     कार्तिक २० गते २०७९ मा प्रकाशित



काठमाडौं, २० कात्तिक । उपाधिको बलियो दावेदारमध्येको एक दक्षिण अफ्रिका विश्वकप क्रिकेटबाट बाहिरिएको छ । सुपर १२ को खेलमा आज बिहान भएको खेलमा नेदरल्यान्ड्ससँग १३ रनले पराजित हुँदै दक्षिण अफ्रिका सेमिफाइनल पुग्नबाट वञ्चित भएको हो ।

अस्ट्रेलियाको एडिलेडमा आज बिहान नेदरल्यान्ड्सले दिएको १५९ रनको लक्ष्य पछ्याएको दक्षिण अफ्रिकाले निर्धारित २० ओभरमा ८ विकेट गुमाउँदै मात्र १४५ रन बनाउन सक्यो । दक्षिण अफ्रिकाका लागि राइली रुसोले सर्वाधिक २५ रन हेनरिक क्लानले २१ रन तथा कप्तान टेम्बा बभुमाले २० रनको योगदान दिए ।

बलिङतर्फ नेदरल्यान्ड्सका लागि बर्नान्डो ग्लोभरले ३ विकेट फ्रेड क्लासेन र बास डिलिडले दुई–दुई विकेट लिए । यसअघि पहिले ब्याटिङ गरेको नेदरल्यान्ड्सले २० ओभरमा ४ विकेट गुमाउँदै १५८ रन बनाएको थियो ।

नेदरल्यान्ड्सका लागि कोलिन एकरम्यानले अविजित ४१ रन, स्टेफन माइबर्गले ३७ रन तथा टम कूपरले ३५ रनको योगदान दिए । बलिङतरेफ दक्षिण अफ्रिकाका लागि केशव महाराजले २, एन्ररिच नोर्टजे र एडेन मार्करमले समान एक–एक विकेट लिए ।
यो नतिजासँगै ४ खेलबाट ६ अंक जोडेको भारत सेमिफाइनलमा पुगेको छ । दक्षिण अफ्रिका ५ खेलबाट ५ अंक जोडेर बाहिरिएको छ । यता ४ खेलबाट समान ४ अंक भएका पाकिस्तान र बंगलादेश मध्य एक टोली सेमिफाइनलमा पुग्नेछ । यी दुई टोलीबीचको खेल अहिले चलिरहरेको छ ।