जितका लागि नेपाललाई १७७ रनको लक्ष्य, ६६ रन बनाएर खेल्दै

-



     सफल आवाज    
     मंसिर २ गते २०७९ मा प्रकाशित



काठमाडौं, २ मंसिर । युएईविरुद्धको तेस्रो तथा अन्तिम एकदिवसीय अन्तर्राष्ट्रिय क्रिकेट प्रतियोगितामा नेपालले जितका लागि १७७ रनको लक्ष्य पाएको छ ।

कीर्तिपुरस्थित त्रिवि क्रिकेट मैदानमा टस हारेर पहिले ब्याटिङको निम्तो पाएको युएईले निर्धारित ५० ओभरमा ९ विकेट गुमाएर १७६ रनको योगफल बनायो । युएईका लागि अयान अफजल खानले अविजित रहँदै ५४ रनको अर्धशतकीय पारी खेले । हजरत विलालले अविजित २० रन बनाए ।

यस्तै अलिशान शराफुले ३३ रन बनाए भने रोहन मुस्तफाले २४ तथा मुहमद वासिमले ११ रन बनाए । नेपालका गुलशन झा, दीपेन्द्र सिंह ऐरी र कुशल भुर्तेलले २र२ विकेट लिए । त्यस्तै सोमपाल कामी र ललित राजवंशीले १र१ विकेट लिए ।

नेपाल र युएईबीचको यस खेल निर्णायक खेलको रुपमा छ । तीन खेलको सिरिजअन्तर्गत नेपाल र युएईबीच १–१ को बराबरीमा रहेको छ । सिरिजको पहिलो खेलमा युएईले नेपाललाई ८४ रनले पराजित गरेको थियो भने दोस्रो खेलमा नेपालले युएईलाई ३ विकेटले हराएको थियो ।

यतिबेला नेपालले २० ओभरमा १ विकेट गुमाउँदै ६६ रन बनाएर खेलिररहेको छ । नेपालका लागि ज्ञानेन्द्र मल्लले २७ तथा आसिफ शेखले २३ रन बनाएका छन् । ओपनर अर्जुन साउद ९ रन बनाएर आउट भए । उनलाई युएईका हजरत बिलालल‍े बोल्ड आउट गरेका हुन् ।